Ministri i Mbrotjes, Ejup Maqedonci ka thënë se militarizimi i vazhdueshëm i Serbisë dhe veçanërisht vendosja e shumë kapaciteteve ushtarake në jug të territorit të saj, është një tregues për vazhdimësinë e qasjes hegjemoniste dhe agresive të Serbisë në raport me Kosovën dhe fqinjët e tjerë.

Deklarata e Maqedoncit vjen pas deklaratës së Ministrisë së Mbrojtjes së Serbisë, të cilët kanë arsyetuar vendosjen e ushtarëve serb 50 metra nga vija kufitare me territorin e Kosovës, përcjell Arbresh.info.

Sipas ministrisë serbe, ushtarët ishin vendosur për pengimin e prerjeve ilegale të pyjeve, ndërsa ministri Maqedonci këtë deklaratë e ka quajtur justifikim.

Lexo edhe:

Kurti: Serbia provokon sërish, ka lëvizur trupat rreth 50 metra afër kufirit me Kosovën

“Në komunikatën e Ministrisë së Mbrojtjes së Serbisë në lidhje me aktivitetet e ushtrisë serbe në afërsi prej 50 metra nga vija kufitare me territorin e Kosovës, një aktivitet tipik ushtarak, mundohet të kamuflohet si aktivitet për pengimin e prerjes ilegale të pyjeve”, ka shkruar ministri Maqedonci në llogarinë e tij në Facebook.

“Prej kur paska filluar ushtria serbe të kryej detyra të ruajtjes së pyjeve dhe për më tepër me ushtarë të armatosur me armë dhe pajisje taktike si dhe me automjete të blinduara ushtarake? Sepse sipas ligjit të pyjeve të Republikës së Serbisë, konkretisht në nenin 40 të tij, është përcaktuar qartë se rojet e pyjeve në kuadër të Ministrisë së Bujqësisë, Pylltarisë dhe Ujërave janë të vetmit zyrtarë për ruajtjen e pyjeve dhe pengimin e prerjes ilegale të tyre brenda territorit të Serbisë”, shtoi tutje ai.

Mes tjerash, Maqedonci shprehu qëndrimin e palëkundur të Kosovës në rrugën për integrimin euroatlantik.

“Në vazhdimësi, Ministria e Mbrojtjes e Republikës së Serbisë përpiqet që prezencën e shtuar ushtarake të ushtarëve serbë në afërsi të territorit të Republikës së Kosovës, ta arsyetoj duke përdorur justifikime tërësisht të paqëndrushme, siç përpiqet që edhe ushtrimet me avionë luftarakë sulmues dhe dronë vetvrasës sulmues, siç ishte ushtrimi “Vihor 2024” në Peshter, t’i paraqes si përgatitje ushtarake për mbrojtje të territorit”, tha Maqedonci.

“Militarizimi i vazhdueshëm i Serbisë dhe veçanërisht vendosja e shumë kapaciteteve ushtarake në jug të territorit të saj, është një tregues për vazhdimësinë e qasjes hegjemoniste dhe agresive të Serbisë në raport me Kosovën dhe fqinjët e tjerë”, u shpreh Maqedonci.

“Gjithsesi, Republika e Kosovës qëndron e palëkundur në rrugëtimin e saj për integrime euro-atlantike dhe do të mbetet gjithmonë e vendosur që të zhvilloj kapacitete ushtarake sipas standardeve të NATO-s, të afta për të mbrojtur territorin dhe sovranitetin e vendit dhe për të kontribuar për paqe dhe siguri në botë”, përfundoi shkrimin ministri i Mbrojtjes./Arbresh.info

Lexo edhe:

Kurti: Serbia provokon sërish, ka lëvizur trupat rreth 50 metra afër kufirit me Kosovën